មន្ត្រីរាជការនៅក្នុងស្រុកប្រាសាទសំបូរ បានធ្វើតេស្ដរកសារធាតុញៀន
(កំពង់ធំ)÷ នៅថ្ងៃទី២៧ ខែមីនា ឆ្នាំ២០២៥
មន្ត្រីរាជការនៅក្នុងស្រុកប្រាសាទសំបូរ បានធ្វើតេស្តរកសារធាតុញៀន តាមប្រសាសន៍របស់សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
ការធ្វើតេស្តរកសារធាតុញៀននៅក្នុងស្រុកប្រាសាទសំបូរមានការចូលរួមពីមន្ត្រីរាជការនៃរដ្ឋបាលស្រុក លោកគ្រូអ្នកគ្រូ បុគ្គលិកមណ្ឌលសុខភាព គ្រូបង្រៀនជាប់កិច្ចសន្យា និងស្មៀនឃុំសរុបចំនួន៥៥៩នាក់ ។
ថ្លែងក្នុងឱកាសនេះលោក ឃីម សុខឃាង អភិបាលស្រុកប្រាសាទសំបូរ បានមានប្រសាសន៍ថា ក្នុងនាមជាមន្ត្រីរាជការ ក៏ដូចជាអ្នកដឹកនាំនៅក្នុងសាលារៀនមួយៗ ត្រូវណែនាំសិស្សានុសិស្ស ឱ្យចេះថែរក្សាអនាម័យ សំអាតបរិស្ថាន គោរពច្បាប់ចរាចរណ៍ ជាពិសេសចៀសឱ្យផុតពីគ្រឿងញៀន ព្រោះគ្រឿងញៀនបានបំផ្លាញជីវិត បំផ្លាញក្រុមគ្រួសារ និងបំផ្លាញប្រទេសជាតិទាំងមូលផងដែរ។
សូមបញ្ជាក់ផងដែរថា ក្រោយពីការធ្វើតេស្តចប់ឃើញថាមន្ត្រីរាជការទាំងអស់នៅក្នុងស្រុកប្រាសាទសំបូរអវិជ្ជមានសារធាតុញៀនទាំងអស់គ្នា។
