(កំពង់ធំ)÷ លោក ឡាយ ស៊ីលី ប្រធានក្រុមប្រឹក្សាស្រុកស្ទោង លោក សាយ គឹមឡម អភិបាលស្រុក បានលើកទឹកចិត្តដូច្នេះនៅក្នុងឱកាសដែលលោក និងភរិយា ព្រមទាំងសហការីបានអញ្ជើញជាអធិបតីភាពក្នុងពិធីអបអរសាទរខួបលើកទី១១៤ ទិវានារីអន្តរជាតិ ០៨មីនា ឆ្នាំ ២០២៥ ក្រោមប្រធានបទ “សិទ្ធិសមភាពនិងភាពអង់អាចក្លាហានចំពោះស្ត្រីនិងក្មេងស្រីគ្រប់រូប ” កាលពីព្រឹកថ្ងៃទី ១៣ ខែមីនា ឆ្នាំ២០២៥ នៅសាលាស្រុកស្ទោង។

ទន្ទឹមនឹងងនេះ លោកបានផ្ដល់នូវបទពិសោធន៍ និងទស្សនៈទានល្អៗមួយចំនួនដល់បងប្អូនស្ត្រីនិងយុវត្តី ក្នុងការចូលរួមអភិវឌ្ឍសហគមន៍ ការចូលរួមលើកកម្ពស់និងអភិវឌ្ឍស្ថាប័ន ជាពិសេសការចូលរួមគ្រប់សកម្មភាពទូទៅរបស់រាជរដ្ឋាភិបាល ក៏ដូចជាកិច្ចការនយោបាយ ក្លាយជាមេភូមិ ក្រុមប្រឹក្សាឃុំ និងមេឃុំជាដើម ដែលជាការឆ្លើយតបទៅនឹងយុទ្ធសាស្ត្ររបស់រាជរដ្ឋាភិបាលក្នុងការកំណត់ស្ត្រីគឺជាឆ្អឹងខ្នងនៃសេដ្ឋកិច្ច សង្គមជាតិ បានជំរុញឱ្យមានវត្តមានរបស់ស្ត្រីកាន់តែច្រើនឡើងៗនៅក្នុងការធ្វើការសម្រេចចិត្តទាំងថ្នាក់ជាតិ ថ្នាក់ក្រោមជាតិ ព្រមទាំងវិស័យឯកជន ជាអ្នកគ្រប់គ្រងស្ថាប័នផង អង្គភាពផងដែរ។

ឆ្លៀតក្នុងឱកាសនោះដែរ លោកបានកោតសរសើរខ្ពស់ដល់លោក លោកស្រីនាយក នាយិកាលោកគ្រូ អ្នកគ្រូ ដែលបានចូលរួមចំណែកយ៉ាងធំធេងក្នុងការលើកកម្ពស់វិស័យអប់រំនៅក្នុងស្រុកស្ទោង ជាពិសេសទទួលបាននូវសាលារៀនស្តង់ដារសាលាគំរូលេខ១ប្រចាំទូទាំងប្រទេសគឺសាលាបឋមសិក្សាក្អិន នៅក្នុងភូមិចំណាលើ ស្រុកស្ទោង ខេត្តកំពង់ធំ។

លោក សាយ គឹមឡម ណែនាំដល់លោកនាយកលោកស្រីនាយិកា លោកគ្រូ អ្នកគ្រូ ទាំងអស់ត្រូវខិតខំរក្សាសាមគ្គីភាពផ្ទៃក្នុងឱ្យកាន់ល្អប្រសើរថែមទៀត ជាពិសេសជាមួយដៃគូអភិវឌ្ឍ អង្គការនានានិងមាតាបិតាសិស្សព្រមទាំងសហគមន៍ទាំងមូល ដើម្បីដឹកនាំនិងអភិវឌ្ឍសាលារៀនឱ្យកាន់តែទទួលបានជោគជ័យថែមទៀត។