(ខេត្តកំពង់ធំ)៖ លោកជំទាវ លំ គន្ធារី ប្រធានស្តីទីគណៈកម្មាធិការសាខាកាកបាទក្រហមកម្ពុជាខេត្តកំពង់ធំ មន្រ្តីសាខា អមដំណើរដោយលោក សាយ គឹមឡម ប្រធានអនុសាខាកាកបាទក្រហមកម្ពុជាស្រុកស្ទោង និងក្រុមការងារ បានចុះសួរសុខទុក្ខ បាននាំយកអំណោយរបស់សាខាកាកបាទក្រហមកម្ពុជាខេត្តកំពង់ធំ ទៅប្រគល់ជូនប្រជាពលរដ្ឋ៣គ្រួសារ ដែលរងគ្រោះដោយភ្លើងឆេះផ្ទះអស់ទាំងស្រុង ដែលបណ្ដាលមកពីឆ្លងចរន្តអគ្គិសនី ស្ថិតនៅភូមិបត់ត្រង់ ឃុំម្សាក្រង  ស្រុកស្ទោង ខេត្តកំពង់ធំ នាព្រឹកថ្ងៃទី០២ ខៃមករា ឆ្នាំ២០២៥។

តាមរបាយការណ៍របស់លោក សាយ គឹមឡម អភិបាលស្រុកស្ទោង បានឱ្យដឹងថា ករណីភ្លើងឆេះផ្ទះអស់៣ខ្នងកាលពីថ្ងៃទី៣១ ខែធ្នូ ឆ្នាំ២០២៤ វេលាម៉ោង២១:០០នាទីយប់ម្ចាស់ផ្ទះមានឈ្មោះ÷ ១. ឈ្មោះ ណូ ណាក់ភេទប្រុសអាយ៥២ឆ្នាំ  បណ្តាលឱ្យខូតខាតផ្ទះ១ខ្នងទំហំ៦ម៉ែត្រ×៧ម៉ែត្រ និងសម្ភារមួយចំនួន។ ២.ឈ្មោះ ស៊ន ណន ភេទស្រី អាយុ៦៨ឆ្នាំ ឆេះផ្ទះ១ខ្នងទំហំ៧ម៉ែត្រ×៨ម៉ែត្រ ប្រក់ក្បឿង ខូចខាតសម្ភារ:មួយចំនួនទាំងស្រុង។ ៣.ឈ្មោះ អេល អុល ភេទប្រុស អាយុ៤០ឆ្នាំ ឆេះផ្ទះ១ខ្នងទំហំ៦ម៉ែត្រ×៧ម៉ែត្រ ប្រក់សង្កសី ខូចខាតសម្ភារៈមួយចំនួនទៀតផងដែរ។

លោកជំទាវ លំ គន្ធារី បានពាំនាំនូវការផ្តាំផ្ញើសួរសុខទុក្ខ និងក្តីអាណិតពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចំពោះជូនប្រជាពលរដ្ឋ៣គ្រួសារ ដែលរងគ្រោះដោយភ្លើងឆេះផ្ទះអស់ទាំងស្រុង ការចុះសួរសុខទុក្ខនាថ្ងៃនេះ គឺជាការអនុវត្តនូវអនុសាសន៍របស់ សម្តេចកិត្តិព្រឹទ្ធបណ្ឌិតប្រធាន កាកបាទក្រហមកម្ពុជា ក្នុងនាមជាអ្នកម្តាយមួយរូប ដែលផ្តោតលើការយកចិត្តទុកដាក់ សមស្របទៅនឹងគោរមងាររបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការ អង្គការសហប្រជាជាតិ ដើម្បីសុខភាពស្ត្រី និងកុមារ ហើយទីណាមានទុក្ខលំបាក ទីនោះមានសាខាកាកបាទក្រហមកម្ពុជា ចុះជួយដល់មូលដ្ឋាន។

លោកជំទាវប្រធានស្តីទីគណៈកម្មាធិការសាខាកាកបាទក្រហមកម្ពុជាខេត្តកំពង់ធំ បានផ្ដាំផ្ញើដល់បងប្អូនទាំងអស់ពេលចេញដំណើរទៅណាមកណា ត្រូវតែប្រុងប្រយ័ត្ននិងបិទកងតាក់ភ្លើង ភ្លើងចង្ក្រាន ភ្លើងធូបទៀនឱ្យបានត្រឹមត្រូវ ដើម្បីការពារគ្រោះថ្នាក់ដែលកើតឡើងដោយយថាហេតុ។ សូមរក្សាសុខភាពឱ្យបានត្រឹមត្រូវ ព្រោះរដូវនេះជារដូវរងារ ធ្វើឱ្យប៉ះពាល់ដល់សុខភាព ហាត់ប្រាណឱ្យបានទៀងទាត់ និងរក្សាអនាម័យបីប្រការគឺ(ហូបស្អាត ផឹកស្អាតនិងរស់នៅស្អាត)។

លោកជំទាវ លំ គន្ធារី បានប្រគល់អំណោយជូនប្រជាពលរដ្ឋ៣គ្រួសារ ដែលរងគ្រោះដោយភ្លើងឆេះផ្ទះអស់ទាំងស្រុង ជាអំណោយរបស់សាខាកាកបាទក្រហមកម្ពុជា ខេត្តកំពង់ធំ ក្នុង១គ្រួសារទទួលបាន÷ អង្ករ មី ត្រីខ ទឹកត្រី ទឹកស៊ីវ មុង ភួយ សារុង ក្រមា ឆ្នាំង២ កន្ទេល១ តង់១ និងថវិកាមួយចំនួន។ ក្នុងនោះអនុសាខាស្រុកស្ទោងបន្ថែមជូនសម្ភារមាន÷ បាឡុង១ឆុត ប្រេងឆា ទឹកត្រី ទឹកស៊ីអីវ និងថវិកាមួយចំនួនផងដែរ។