(ខេត្តកំពង់ធំ)៖ នៅព្រឹកថ្ងៃទី២១ ខែវិច្ឆិកា ឆ្នាំ២០២៤ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍នៃគណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ បានដឹកនាំកិច្ចប្រជុំ ប្រកាសសេចក្តីសម្រេចស្ដីពីការកែសម្រួលទីបញ្ជាការស្រាលក្នុងការការពារទប់ស្កាត់ និងបង្ក្រាបបទល្មើសធនធានធម្មជាតិ និងប្រគល់ប្រេងឥន្ធនៈ ស្បៀងអាហារគ្រឿងឧបភោគបរិភោគ ថ្នាំពេទ្យ ភេសជ្ជៈ និងថវិកាមួយចំនួន ដែលជាអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវ តាមរយៈឯកឧត្តមនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក និងឯកឧត្ដម នួន ផារ័ត្ន អភិបាលខេត្តកំពង់ធំ ជូនដល់កងកម្លាំងចម្រុះនៅទីបញ្ជាការស្រាលចំនួន២ គោលដៅ ស្ថិតនៅក្នុងឃុំសាគ្រាម ស្រុកប្រាសាទបល្ល័ង្ក ខេត្តកំពង់ធំ។
លោកវរសេនីយ៍ឯក សោម សុភាវុធ មេបញ្ជាការរង នាយសេនាធិការ និងជាអនុប្រធានអចិន្ត្រៃយ៍នៃក្រុមលេខាធិការដ្ឋានគណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិ បានអានសេចក្តីសម្រេចស្ដីពីការកែសម្រួលសមាសភាពទីបញ្ជាការស្រាលប្រចាំការនៅតំបន់ព្រៃជម្រកសត្វបឹងពែរ ដោយចែកចេញជាពីរទីបញ្ជាការស្រាលនៅតំបន់ភ្នំប្រង់ និងទីបញ្ជាការស្រាលនៅតំបន់ជាំក្របី ដោយប្រើប្រាស់កម្លាំងចម្រុះ ងាយស្រួលក្នុងការធ្វើសកម្មភាពការពារទប់ស្កាត់ និងបង្ក្រាបទល្មើសធនធានធម្មជាតិ។
លោក តុប កក្កដា ប្រធានមន្ទីរបរិស្ថានខេត្ត បានណែនាំដល់មន្ត្រីក្រោមឱវាទនិងអាជ្ញាធរដែនដី ត្រូវផ្សព្វផ្សាយ ជូនដល់ប្រជាពលរដ្ឋ ឲ្យបានយល់ជ្រួតជ្រាបអំពីច្បាប់ស្តីពីការគ្រប់គ្រងការពារតំបន់ធនធានធម្មជាតិ និងដោយឡែកចំពោះបងប្អូនប្រជាពលរដ្ឋ ដែលកំពុងបន្តសកម្មភាពលើដី ដែលច្បាប់ហាមឃាត់ ត្រូវបញ្ឈប់ជាបន្ទាន់ និងមិនត្រូវកាប់ទន្ទ្រានព្រៃឈើ ក្នុងតំបន់ហាមឃាត់ជាថ្មីទៀតជាដាច់ខាត។
ឧត្តមសេនីយ៍ទោ សោម ស៊ុន បានបញ្ជាក់ថា ដោយអនុវត្តតាមបទបញ្ជារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បទបញ្ជារបស់ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ និងបទបញ្ជារបស់ឯកឧត្តម នួន ផារ័ត្ន អភិបាលខេត្ត និងជាប្រធានគណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ ដែលបានប្រគល់ភារកិច្ចឲ្យកងកម្លាំងចម្រុះ ត្រូវសហការគ្នាឲ្យបានល្អក្នុងការការពារទប់ស្កាត់ និងបង្ក្រាបឲ្យខាងតែបាន ដោយមិនឱ្យមានការកើតឡើងជាថ្មីនៅការកាប់ទន្ទ្រានព្រៃឈើយកដីរបស់រដ្ឋធ្វើជាកម្មសិទ្ធិ និងត្រូវធ្វេីការគ្រប់គ្រងដីរបស់រដ្ឋ ដែលបានលួចកាប់ទន្ទ្រានដោយខុសច្បាប់កន្លងមកឲ្យនៅគង់វង្ស ទុកជាសម្បត្តិរដ្ឋ ដើម្បីដាំស្ដារព្រៃឈើឡើងវិញនៅរដូវវស្សាខាងមុខ។
ឧត្តមសេនីយ៍ទោ សោម ស៊ុន បានប្រគល់ភារកិច្ចសំខាន់ៗមួយចំនួន ជូនដល់កងកម្លាំងចម្រុះទាំងពីរគោលដៅនៃទីបញ្ជាការស្រាល ត្រូវប្តេជ្ញាចិត្តឱ្យបានដាច់ខាត គោរពអនុវត្តឱ្យបានម៉ឺងម៉ាត់តាមច្បាប់ បទបញ្ជា និងលិខិតបទដ្ឋាននានា ដែលបានដាក់ចេញ ប្រកបដោយស្មារតីទទួលខុសត្រូវខ្ពស់ តាមភារកិច្ច ដែលបានប្រគល់ជូន ក្នុងនោះឧត្តមសេនីយ៍ទោ សោម ស៊ុន ក៏បានសំណូមពរដល់អាជ្ញាធរដែនដី និងមន្ត្រីមានសមត្ថកិច្ចជំនាញ ត្រូវផ្សព្វផ្សាយអប់រំជូនប្រជាពលរដ្ឋ ឲ្យបានយល់ជ្រូតជ្រាប និងត្រូវអនុវត្តន៍វិធានការច្បាប់យ៉ាងមុឺងម៉ាត់ដោយគ្មានការលេីកលែងចំពោះជនណានៅតែបំពានក្នុងការទន្រានយកដីរដ្ឋធ្វេីជាកម្មសិទ្ឋ។
នៅក្នុងឱកាសនេះឧត្តមសេនីយ៍ទោ សោម ស៊ុន ក៏បានប្រគល់ជូនប្រេងឥន្ធនៈ ស្បៀងអាហារ គ្រឿងឧបភោគបរិភោគ ភេសជ្ជៈ ថ្នាំពេទ្យ និងថវិកាចំនួន ២ លាន រៀលដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈឯកឧត្តមនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក និងឯកឧត្ដម នួន ផារ័ត្ន អភិបាលខេត្តកំពង់ធំ ព្រមទាំងជំនួយឧបត្ថម្ភរបស់លោកតុប កក្កដា ប្រធានមន្ទីរបរិស្ថានខេត្តកំពង់ធំ ជូនដល់កងកម្លាំងចម្រុះ ដើម្បីបន្តធ្វើសកម្មភាព ដោយគ្មានការដកថយឡើយ៕
