សួនច្បារយ៉ាងស្រស់ស្អាតរបស់សម្ដេចចៅហ្វាវាំង គង់ សំអុល ដែលកសាងឡើងសម្រាប់លម្អក្រុងកំពង់ឆ្នាំង ក៏ដូចជាទីកម្សាន្ត និងការហាត់ប្រាណរបស់ប្រជាពលរដ្ឋ ត្រូវបានគេយកទៅធ្វើអាជីវកម្ម ធ្វើឱ្យប៉ះពាល់ដល់ការហាត់ប្រាណ
ខេត្តកំពង់ឆ្នាំង ៖ សួនច្បារយ៉ាងស្រស់ស្អាតរបស់សម្ដេចចៅហ្វាវាំង គង់ សំអុល ដែលកសាងឡើងសម្រាប់លម្អក្រុងកំពង់ឆ្នាំង ក៏ដូចជាទីកម្សាន្ត និងការហាត់ប្រាណរបស់ប្រជាពលរដ្ឋ ត្រូវបានគេយកទៅធ្វើអាជីវកម្ម ធ្វើឱ្យប៉ះពាល់ដល់ការហាត់ប្រាណរបស់បងប្អូនប្រជាពលរដ្ឋ។
ក្រុមអ្នកប្រកបមុខរបរដាក់ស្គីជួលឱ្យក្មេងៗជិះនៅក្នុងសួនសម្ដេចចៅហ្វាវាំង គង់ សំអុល បានប្រាប់ឲ្យដឹងថា មានអ្នកម៉ៅការផ្ដាច់ក្នុងការដាក់ស្គីសម្រាប់ក្មេងជិះនៅក្នុងសួនច្បារសម្ដេចចៅហ្វាវាំង គង់ សំអុល ដែលគេស្គាល់ថា ឈ្មោះ «រតនា» ដោយយកពីក្រុមអាជីវករដាក់ស្គីឲ្យក្មេងៗជិះក្នុងមួយខែម្នាក់ចំនួន១០០ដុល្លារ។
ប្រភពដដែលបានឲ្យដឹងថា នៅក្នុងសួនសម្ដេចចៅហ្វាវាំង គង់ សំអុល ផ្នែកខាងក្នុង ដែលមានក្រាលការ៉ូឡា សម្រាប់ការដើរកម្សាន្ត និងហាត់ប្រាណ ត្រូវបានគេចងខ្សែធ្វើជារបងមិនអនុញ្ញាតឱ្យមានការដើរចូលហាត់ប្រាណបានឡើយ។ ផ្ទុយទៅវិញ គេបានរៀបចំកំណត់ទីតាំងច្បាស់លាស់ពីអក្សរ A ដល់អក្សរ N មានបិទឈ្មោះអាជីវករលើស្គីទាំង១៦ទីតាំង ស្មើនឹងអាជីវករ១៦នាក់ ដោយក្នុងម្នាក់ៗត្រូវបង់ឱ្យឈ្មោះ «រតនា» ចំនួន១០០ដុល្លារ។
ស្រី្តជាអាជីវករដាក់ស្គីជួលឱ្យក្មេងជិះមានឈ្មោះ ជូ ចាន់រ័ត្ន មានទីលំនៅភូមិម៉ុងបារាំង សង្កាត់ប្អេរ ក្រុងកំពង់ឆ្នាំង បានឱ្យដឹងថា ៖ ទីតាំងគាត់មានអក្សរសម្គាល់ អក្សរ H នៅបែកខាងលិចនៃសួនកុមារ ហើយក្នុងមួយខែគាត់ត្រូវបង់ឱ្យឈ្មោះ «រតនា» ១០០ដុល្លារ។ ប៉ុន្តែទាំងរូបគាត់ និងអាជីវករដទៃទៀតអាចដាក់ស្គីត្រឹមតែ៧គ្រឿងតែប៉ុណ្ណោះ មិនអាចដាក់លើសពីនេះបានទេ។ ដោយឡែកឈ្មោះ «រតនា» ដែលជាអ្នកម៉ៅការ បានដាក់ស្គីសម្រាប់ជួលឱ្យក្មេងជិះចាប់ពី១០គ្រឿងទៅ២០គ្រឿង ដែលឱ្យឈ្មោះ «ឆាលី» ជាអ្នកទទួលខុសត្រូវ។
ស្ត្រីជាអាជីវកររូបនោះ បានបន្តថា កាលពីរដូវប្រាំង ពួកគាត់មានលទ្ធភាពរកប្រាក់បង់ឲ្យឈ្មោះ «រតនា» បាន ប៉ុន្តែចាប់ពីរដូវវស្សាចូលមកដល់ ពួកគាត់មិនអាចរកចំណូលបាននោះទេ។ ម្ល៉ោះហើយ ត្រូវខាតដើម ដោយសារបញ្ហានេះ ទើបមានអាជីវករម្នាក់ ក្នុងចំណោម១៦នាក់បានដកខ្លួនចេញ ។ យ៉ាងនេះកី្ត អាជីវកររូបនោះបានសំណូមពរដល់ថ្នាក់ដឹកនាំ មេត្តាបញ្ចុះថ្លៃពួកគាត់ដែលជាអាជីវករដាក់ជួលស្គីឲ្យក្មេងៗជិះត្រឹមមួយខែ២០ម៉ឺនរៀលបានហើយ។
ទាក់ទងនឹងបញ្ហាខាងលើនេះដែរ លោក ហ៊ីង ភ័ព្វមីនា អភិបាលក្រុងកំពង់ឆ្នាំង មានប្រសាសថា កន្លងទៅ ប្រជាពលរដ្ឋដែលទៅហាត់ប្រាណនៅក្នុងសួនច្បារសម្ដេចចៅហ្វាវាំង គង់ សំអុល បានជួបបញ្ហាដោយសារក្មេងៗជិះស្គីបុកបង្កឱ្យមានគ្រោះថ្នាក់ដល់អ្នកហាត់ប្រាណ ម្ល៉ោះហើយទើបក្រោយមកមានការរៀបចំឲ្យមានសណ្ដាប់ធ្នាប់ ដោយឱ្យមានអ្នកទទួលខុសត្រូវរៀបចំទៅខាងក្នុងសួន។ ចំណែកឯអ្នកហាត់ប្រាណត្រូវដើរហាត់ប្រាណលើការូណានៅជុំវិញសួនតែប៉ុណ្ណោះ មិនអាចដើរខាងក្នុងបានទេ ដើម្បីចៀសវាងគ្រោះថ្នាក់ ដោយសារក្មេងៗជិះស្គីបុកបន្តទៀត។
លោកបន្តថា ចំណែករឿងយកប្រាក់ពីអាជីវករក្នុងម្នាក់១០០ដុល្លារ លោកមិនបានដឹងនោះទេ សង្ស័យមានការត្រូវរ៉ូវគ្នារវាងអ្នកសុំដាក់ស្គី ជាមួយនឹងឈ្មោះ «រតនា» ជាអ្នករៀបចំនោះហើយ មិនពាក់ព័ន្ធដល់អាជ្ញាធរក្រុងឡើយ ហើយលោកក៏មិនបានស្គាល់ឈ្មោះ «រតនា» នោះ តើជានរណាដែរ?។
យ៉ាងនេះក្តី សួនច្បារសម្ដេចចៅហ្វាវាំង គង់ សំអុល គឺកសាងឡើងសម្រាប់កែលម្អទីក្រុងឱ្យមានសោភ័ណភាពស្រស់ស្អាត ប្រជាពលរដ្ឋសប្បាយរីករាយចិត្តទៅអង្គុយលេងកម្សាន្តហាត់ប្រាណនាពេលរសៀល និងពេលព្រឹក។ ប៉ុន្តែអ្វីដែលជាឧបសគ្គ និងខុសបំណងរបស់ពួកគាត់ គឺគេយកទីតាំងហាត់ប្រាណនៅប៉ែកខាងក្នុងធ្វើអាជីវកម្ម ផ្ទុយពីគម្រោងក្នុងការកសាងសួនច្បារនៅក្នុងក្រុងកំពង់ឆ្នាំង។ ម្យ៉ាងទៀត តើចំណូលទាំងនោះ គេយកទៅធ្វើអ្វី? ។ ចំណែកឈ្មោះ «រតនា» តើជានរណា? យើងមិនអាចសុំការបំភ្លឺបាននោះទេ៕
